SHIN KO YA HARAMTA A SADU DA MACE MAI CIKI.

Malam naji wasu mutane na fadar cewa baya halatta idan matar mutum tana da ciki yayi jima’i da ita har saita haihu menene gaskiyar maganar ???

AMSA
-----
DA SUNAN ALLAH MAI RAHMA MAIJIN QAI.

To dan’uwa ya halatta a sadu da mace lokacin da take da ciki.

Saboda fadin Annabi tsira da amincin Allah su tabbata a gareshi cewa:

“Duk wanda yayi imani da Allah da ranar lahira, to kada ya shayar da ruwansa ga shukar waninsa”

Abu-dawud ya rawaito a hadisi mai lamba: 1847

Ibnul kayim jawziyya babban likitan nan na musulunci yana cewa:

“Wannan hadisi yana nuna cewa ciki yana kara karfi duk lokacin da ake saduwa, saboda Annabi tsira da amincin Allah su tabbata a gareshi ya kamanta shi da shuka, ita kuma shuka tana kara girma, idan aka ba ta ruwa”

Kuduba Tahzibus-sunan 1\193 .

Saidai masana likitanci a wannan zamani suna cewa:

Ba’a so miji ya dinga hawa kan matarsa lokacin da take da ciki, zaifi kyau ta dinga yin goho yayin da zasu sadu, ko kuma ya sadu da ita ta gefe, saboda kwanciya akanta yana iya wahalar da yaron.

Sannan yawanci mata basu cika son yawan saduwa ba idan cikinsu ya girma, wasu likitocin suna bada shawara cewa a Qaranta saduwa dasu a wadannan lokutan.

WALLAHU A'ALAM